Sunday 9 September 2012

حشو دماغ

بسم الله ~

واحنا قاعدين في الاجتماع الأسبوعي لـ (شباب من أجل بيئة مستدامة وفهم أفضل) 
كان في عرض مميز جدا عن التعليم في بلدنا 
وكان من الواضح ان الموضوع وجع كل الجمهور فكانوا كــــلــــــهـــــم (بما فيهم أنا) عايزين يعلقوا
أو بمعنى أدق .. يفضفضوا!

مع إن صاحبة العرض وازنت تماما بين إلقاء اللوم على كل الأطراف (المدرس - المدرسة - الطالب - الأهل)
كانت معظم التعليقات افتراااااا ع المدرس

ولأني -الحمدلله- قابلت -الحمدلله- مدرسين كتير -الحمدلله- عندهم ضمير .. الحمد لله...

فحسيت بظلم ...

افتكرت يوم ما مدرس عندنا حاول يكون غير
ويشرح بصور على slideshow 
الطلبة كانوا مبسوطين جدا
والإدارة مبسوطة طول ما الطلبة مبسوطين...

إلى أن زار مدرستنا البعبع
مجموعة من الأهالي اللي مش فارق معاهم غير المجموع 
"العيال فاهمين اه بس المدرس بيشرح بضمير زيادة وكده مش هليحقوا يحلوا الامتحانات 118 مرة عشان يحفظوا الأسئلة ويدخلوا يقفلوا الامتحان"
ومن بعدها سمعت أحد الأهالي دول بيكلم عن أد ايه -اوه ماي جودنس- التعليم بقى تيريبل تيريبل !

*نفس عميق*

ماشي يا عمو\طنط أنتم عايزين أحسن كلية لابنكم .. لكن ماهو ممكن يدخل كلية قمة اووووه وأبهة ومنظرة وفشخرة ع الجيران ويطلع -معذرة- ولا حاجة...
وممكن يتعلم ازاي يفهم ويدخل كلية مش بتاخد 101% بس يؤدي فيها تماااااام ... علشان شغّل مخه !
وبعدين كان حد قال لكم ان في ماما امريكا كل الطلبة بتدخل طب وهندسة؟

لو نسينا كلام الجيران شوية وفكرنا في عقل الإنسان اللي بيبتبني في الـ12 سنة بتوع المدارس ماكانش بقى ده الحال
ماتقولش هي الدنيا كده .. هي دنيتك كده .. وأكبر دليل على كده ان لما أتيحت لك فرصة رفضت وجريت لنطاق الراحة القديم بتاعك

المهم .. 
وهذا الطالب -اللي اتعود يرمى معظم اللوم على المدرس والمدرسة والأهل والسياسات وإسرائيل والماسونية والإشعاعات الكونية- اتعرض أمامه عرض علمي بحت بطريقة بسيطة عن تاريخ الكون .. عرض مدته 10 دقائق .. وكان في نظري ممتع جدا .. ومفيد جدا

أحزنني ان العرض ده أخد 12 صوت بينما العرضين الآخرين جابوا 23 و25 !
واللي كسب بـ25 صوت ده كان عن ازاي تكون سعيد ... (ودي في رأيي الشخصي ماحدش يقدر ينقلها بالكلام - ما عدا عمرو سلامة)

فـ بصراحة اللي احنا مش صادقين مع نفسنا كطلبة وأهالي وبنرمي اللوم ع الدولة علشان نرتاح
لكن علمني كل العلماء المصريين اللي اتخرجوا من مدارس مصرية ثم جامعات مصرية ان اللي عايز يتعلم .. لو صدق وتعب وعافر .. هيتعلم !

لو صدق !


بس كده !